C'est force, faire le weil

C'est force, faire le weil

Guillaume de Machaut

C'est force, faire le weil

Tuit mi desir

Sont et seront en servir

Vo bel acueil,

Chiere dame, et d'acomplir

Vostre doulz weil.

Car vous me faites sentir

Et conjoir,

Par vo doulz riant regart,

Un dous mal a soustenir

Que weil soufrir

Humblement, se Dieus me gart.

Mais souvent pleure mi oueil

Quant je remir

Vo gent corps par souvenir,

Dont mon vis mueil.

Lors de mon cuer meint souspir

Passent le sueil.

C'est force, faire le weil

Tuit mi desir

Sont et seront en servir

Vo bel acueil,

Chiere dame, et d'acomplir

Vostre doulz weil.

Ne je ne me puis tenir

D'einsi gemir

Celeement et a part,

Pour doubte qu'a vo plaisir

Ne puist venir

Le service, ou mon cuer art,

Sans avoir peinne ne dueil;

Car se fremir,

Teindre, trambler et palir

Plus que ne sueil,

Me fait et vous oubeir,

Pas ne m'em dueil.

C'est force, faire le weil

Tuit mi desir

Sont et seront en servir

Vo bel acueil,

Chiere dame, et d'acomplir

Vostre doulz weil.